പാലക്കാട്: ശക്തമായ മഴയിൽ വീടിന്റെ ചുമരിടിഞ്ഞുവീണ് ഉറങ്ങിക്കിടന്നയാൾ മരിച്ചു. നെന്മാറ പുത്തൻതറ കണിമംഗലം സ്വദേശി മുരുകേശൻ, 58, ആണ് മരിച്ചത്.
വ്യാഴാഴ്ച രാത്രിയുണ്ടായ ശക്തമായ മഴയിലാണ് അപകടം. വീട്ടിൽ ഒറ്റയ്ക്ക് താമസിച്ചുവരികയായിരുന്നു മുരുകേശൻ.
വെള്ളിയാഴ്ച രാവിലെ സഹോദരൻ വീട്ടിലെത്തിയപ്പോഴാണ് ചുമരിടിഞ്ഞുവീണത് ശ്രദ്ധയിൽപ്പെട്ടത്. തുടർന്ന് പ്രദേശവാസികളുടെ സഹായത്തോടെ നടത്തിയ തിരച്ചിലിൽ മണ്ണിനടിയിൽനിന്ന് മുരുകേശനെ കണ്ടെത്തി.
ഉടൻ നെന്മാറ സാമൂഹികാരോഗ്യ കേന്ദ്രത്തിലെത്തിച്ചെങ്കിലും മരണം സംഭവിച്ചിരുന്നു. പൊലീസ് നടപടികൾ പൂർത്തിയാക്കിയ ശേഷം വൈകിട്ടോടെ വക്കാവ് പൊതുശ്മശാനത്തിൽ മൃതദേഹം സംസ്കരിച്ചു.
