സോഷ്യൽ മീഡിയ സെൻസേഷനുകളെ അണിനിരത്തി തിയേറ്ററുകളിൽ ചിരിപ്പൂരം തീർത്ത ‘വാഴ’യുടെ രണ്ടാം ഭാഗം ബോക്സ് ഓഫീസിൽ റെക്കോർഡുകൾ തിരുത്തിക്കുറിക്കുന്നു. റിലീസ് ചെയ്ത് വെറും നാല് ദിവസം കൊണ്ട് ഒന്നാം ഭാഗത്തിന്റെ ലൈഫ് ടൈം കളക്ഷൻ മറികടന്ന ചിത്രം ആഗോളതലത്തിൽ 60 കോടിയിലധികം രൂപയാണ് സ്വന്തമാക്കിയത്. ഹാഷിറും സംഘവും തകർത്താടിയ ചിത്രം പ്രേക്ഷകർ ഇരുകൈയും നീട്ടിയാണ് സ്വീകരിച്ചിരിക്കുന്നത്.
ഏപ്രിൽ രണ്ടിന് തിയേറ്ററുകളിലെത്തിയ ‘വാഴ 2’ ആദ്യ ദിനം മുതൽക്കേ വൻ കുതിപ്പാണ് നടത്തുന്നത്. ആദ്യ ദിനം തന്നെ 10.5 കോടി രൂപയുടെ ആഗോള കളക്ഷൻ നേടിയ ചിത്രം പിന്നീട് ഓരോ ദിവസവും കളക്ഷനിൽ വർദ്ധനവ് രേഖപ്പെടുത്തി. ആദ്യ ഞായറാഴ്ചയായ ഇന്നലെ മാത്രം 8.40 കോടി രൂപയാണ് ചിത്രം നേടിയത്. ശനിയാഴ്ചത്തെ കളക്ഷനേക്കാൾ 16.7 ശതമാനത്തിന്റെ വളർച്ചയാണ് ഞായറാഴ്ച ഉണ്ടായത്.
സാക്നിൽക് വെബ്സൈറ്റിന്റെ കണക്കുകൾ പ്രകാരം ഇന്ത്യയിൽ നിന്ന് മാത്രം നാല് ദിവസം കൊണ്ട് 29.70 കോടി രൂപ ചിത്രം നേടി. ഓവർസീസ് കളക്ഷൻ 33.25 കോടിയാണ്. ഇതോടെ ആകെ ആഗോള കളക്ഷൻ 62.95 കോടി രൂപയിലെത്തി. 2024 ഓഗസ്റ്റിൽ റിലീസ് ചെയ്ത വാഴയുടെ ഒന്നാം ഭാഗം നേടിയ 41.75 കോടി എന്ന റെക്കോർഡ് വെറും മൂന്ന് ദിവസം കൊണ്ട് തന്നെ രണ്ടാം ഭാഗം മറികടന്നു എന്നത് ചിത്രത്തിന്റെ വലിയ വിജയമാണ് സൂചിപ്പിക്കുന്നത്.
സോഷ്യൽ മീഡിയ താരങ്ങളായ ഹാഷിർ ആൻഡ് ഗ്യാങ്, അൽ അമീൻ എന്നിവർക്കൊപ്പം അൽഫോൻസ് പുത്രൻ, അജു വർഗീസ്, വിജയ് ബാബു എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. ഒന്നാം ഭാഗത്തേക്കാൾ മികച്ച കോമഡിയും ഹൃദയസ്പർശിയായ ഇമോഷണൽ രംഗങ്ങളുമാണ് ചിത്രത്തിന്റെ വിജയത്തിന് പിന്നിലെന്ന് പ്രേക്ഷകർ അഭിപ്രായപ്പെടുന്നു. സവിൻ എസ്.എ. സംവിധാനം ചെയ്ത ചിത്രത്തിന് വിപിൻ ദാസാണ് തിരക്കഥ ഒരുക്കിയിരിക്കുന്നത്.
സോഷ്യൽ മീഡിയ ക്രിയേറ്റർമാരെ പ്രധാന കഥാപാത്രങ്ങളാക്കി സിനിമ പുറത്തിറക്കാനുള്ള വിപിൻ ദാസിന്റെ പരീക്ഷണം ബോക്സ് ഓഫീസിൽ ചരിത്ര വിജയമായി മാറുകയാണ്. വരും ദിവസങ്ങളിലും ചിത്രം കൂടുതൽ റെക്കോർഡുകൾ തകർക്കുമെന്നാണ് സിനിമാ ലോകത്തെ വിലയിരുത്തൽ.
