ഇംഫാല്‍: കൈക്കുഞ്ഞുള്‍പ്പെടെ രണ്ട് കുട്ടികളുടെയും ഒരു സ്ത്രീയുടെയും അഴുകിയ നിലയിലുള്ള മൃതദേഹങ്ങള്‍ മണിപുര്‍-അസം അതിര്‍ത്തിയില്‍ കണ്ടെത്തി. ഒരു കുടുംബത്തിലെ ആറ് പേരെ തീവ്രവാദികള്‍ മണിപുരിലെ ജിരിബാമില്‍ നിന്ന് തട്ടിക്കൊണ്ടുപോയിരുന്നു. സംഭവം നടന്ന് ദിവസങ്ങള്‍ക്ക് ശേഷമാണ് മൃതദേഹങ്ങള്‍ കണ്ടെത്തിയിരിക്കുന്നത്.
കുടുംബത്തെ തട്ടിക്കൊണ്ടുപോയ പ്രദേശത്ത് നിന്നും ഏകദേശം 15 കിലോമീറ്റര്‍ അകലെ മണിപുര്‍-അസം അതിര്‍ത്തിയിലുള്ള ഒരു നദിക്ക് സമീപത്തു നിന്നുമാണ് മൂന്ന് മൃതദേഹങ്ങള്‍ കണ്ടെത്തിയിട്ടുള്ളത്. തട്ടിക്കൊണ്ടു പോയവരില്‍ ആരുടെയെങ്കിലും മൃതദേഹമാണോയെന്ന് വ്യക്തമല്ലെന്ന് സൈനിക ഉദ്യോഗസ്ഥര്‍ പറഞ്ഞു. അസമിലെ സില്‍ച്ചാര്‍ മെഡിക്കല്‍ കേളേജിലേക്ക് മൃതദേഹങ്ങള്‍ തിരിച്ചറിയുന്നതിനായി കൊണ്ടുപോയിരിക്കുകയാണ്. കൊല്ലപ്പെട്ടവര്‍ ആരാണെന്ന് ഡിഎന്‍എ പരിശോധനയ്ക്ക് ശേഷമേ തിരിച്ചറിയാനാകുവെന്നും മൃതദേഹങ്ങള്‍ തിരിച്ചറിയാനായി അന്വേഷണം തുടരുകയാണെന്നും ഉദ്യോഗസ്ഥര്‍ വ്യക്തമാക്കി.
തട്ടിക്കൊണ്ടുപോകപ്പട്ടവരില്‍ ഒരാളെക്കുറിച്ചും ഇതുവരെ യാതൊരു വിവരവും ലഭിച്ചിട്ടില്ല. ഇവരെ കണ്ടെത്താനുള്ള അന്വേഷണം തുടരുകയാണെന്നും ഉദ്യോഗസ്ഥര്‍ അറിയിച്ചു. നേരത്തെ, കാണാതായ ആറ് പേരെ കണ്ടെത്തണമെന്ന് ആവശ്യപ്പെട്ട് ജില്ലയില്‍ 48 മണിക്കൂര്‍ പണിമുടക്ക് ജിരിബാം ജില്ലയിലെ ജിരി യുണൈറ്റഡ് കമ്മിറ്റി (ജെയുസി) പ്രഖ്യാപിച്ചിരുന്നു. ഇതിനിടെയാണ് മൂന്ന് മൃതദേഹങ്ങള്‍ കണ്ടെടുത്തത്. വാര്‍ത്ത പുറത്ത് വന്നതോടെ ഇംഫാല്‍ താഴ്വരയില്‍ വീണ്ടും പ്രക്ഷോഭം ആരംഭിച്ചിരിക്കുകയാണ്. സംഘര്‍ഷാവസ്ഥയെ തുടര്‍ന്ന് സ്‌കൂളുകള്‍ക്കും കോളേജുകള്‍ക്കും അവധി പ്രഖ്യാപിച്ചിട്ടുണ്ട്.
