ഓരോ പഞ്ചായത്തിലും റവന്യൂ വകുപ്പ് നല്‍കിയ അരിയുടെ കണക്കുകള്‍ ഉണ്ടെന്ന് മന്ത്രി കെ രാജന്‍. യാതൊരു പ്രശ്‌നവും റവന്യൂ വകുപ്പ് വിതരണം ചെയ്ത അരിയില്‍ ഉണ്ടായിട്ടില്ല. മേപ്പാടിക്കൊപ്പം അരി വിതരണം ചെയ്ത മറ്റു പഞ്ചായത്തുകളില്‍ ഒരു പ്രശ്‌നവുമില്ല. 2 മാസം മുമ്പ് കിട്ടിയ ഭക്ഷ്യ വസ്തുക്കളിലാണ് പ്രശ്നമെന്നാണ് പുതിയ വാദം, രണ്ട് മാസമായിട്ടും എന്തുകൊണ്ട് ഈ ഭക്ഷ്യ വസ്തുക്കള്‍ വിതരണം ചെയ്തില്ല? തിരഞ്ഞെടുപ്പ് വരാന്‍ കാത്തുവെച്ചതാണോവെന്നും മന്ത്രി ചോദിച്ചു.
‘ഇത് മോശമാണ്. മറ്റിടങ്ങളില്‍ സെപ്റ്റംബറില്‍ നല്‍കിയ ഭക്ഷ്യ വസ്തുക്കള്‍ വിതരണം ചെയ്ത് കഴിഞ്ഞിട്ടുണ്ട്. രാഹുലിന്റെയും പ്രിയങ്കയുടെയും മുഖം പതിപ്പിച്ച കിറ്റുകള്‍ എങ്ങനെ വന്നു. ഇനിയും രാഷ്ട്രീയ നേട്ടത്തിനായി മേപ്പാടി ദുരന്ത ബാധിതരെ ഉപയോഗിക്കരുത്. ഏതെങ്കിലും ഏജന്‍സികള്‍ നല്‍കിയ ഭക്ഷ്യ വസ്തുക്കള്‍ ആണെങ്കില്‍ എന്ത് കൊണ്ട് ഇതുവരെയും വിതരണം ചെയ്തില്ല. ഈ വിവാദം തിരഞ്ഞെടുപ്പ് കഴിഞ്ഞാല്‍ കെട്ടടങ്ങുമെന്നാണ് കരുതുന്നത്. വിഷയത്തില്‍ ഡിഎംഒയോട് കളക്ടര്‍ വിശദീകരണം തേടിയിട്ടുണ്ട്’ മന്ത്രി വ്യക്തമാക്കി.
