കൊല്‍ക്കത്ത: മാലിന്യം തള്ളുന്ന സ്ഥലത്ത് പ്ലാസ്റ്റിക് കവറില്‍ കണ്ടെത്തിയത് സ്ത്രീയുടെ അറുത്തുമാറ്റിയ ശിരസ്. കൊല്‍ക്കത്തയിലെ ടോളിഗഞ്ചിലാണ് നാടിനെ നടുക്കിയ സംഭവം. ഗ്രഹാം റോഡിന് സമീപത്തെ മാലിന്യക്കൂനയില്‍ നിന്ന് മാലിന്യം ശേഖരിക്കാനെത്തിയവരാണ് സ്ത്രീയുടെ ശിരസ് കണ്ടെത്തിയത്.
വിവരം പൊലീസില്‍ അറിയിച്ചതിന് പിന്നാലെ മുതിര്‍ന്ന പൊലീസ് ഉദ്യോഗസ്ഥര്‍ അടക്കം സംഭവ സ്ഥലത്ത് എത്തിയിട്ടുണ്ട്. കണ്ടെത്തിയ ശരീരഭാഗം എം ആര്‍ ബാംഗൂരിലെ ആശുപത്രിയിലേക്ക് മാറ്റിയിരിക്കുകയാണ്. മൃതദേഹഭാഗം കണ്ടെത്തിയതായും സംഭവത്തില്‍ പൊലീസ് അന്വേഷണം ആരംഭിച്ചതായുമാണ് പൊലീസ് വിശദമാക്കിയിട്ടുള്ളത്.
കൊല്‍ക്കത്ത മുന്‍സിപ്പല്‍ കോര്‍പ്പറേഷന്‍ പരിധിയിലെ 95ാം വാര്‍ഡിലാണ് അറുത്ത് മാറ്റിയ നിലയില്‍ ശിരസ് കണ്ടെത്തിയത്. ഗോള്‍ഫ് ഗ്രീന്‍ പൊലീസിന്റെ നേതൃത്വത്തിലാണ് അന്വേഷണം പുരോഗമിക്കുന്നത്. ആളെ തിരിച്ചറിയാനുള്ള ശ്രമങ്ങളും ശേഷിക്കുന്ന മൃതദേഹഭാഗങ്ങള്‍ കണ്ടെത്താനും അന്വേഷണം ഊര്‍ജ്ജിതമാക്കിയതായാണ് പൊലീസ് വിശദമാക്കുന്നത്.
