ഏറെനാള്‍ നീണ്ടുനിന്ന ദുരിതത്തിനൊടുവിലാണ് മലയാളികളായ ഏഴംഗസംഘം തിരികെ നാട്ടിലെത്തിയത്. കൊച്ചിയില്‍ വിമാനമിറങ്ങിയ ഇവര്‍ ജന്മനാടായ വടകരയില്‍ വൈകിട്ടോടെ എത്തും. യുവാക്കള്‍ ഒക്ടോബര്‍ മൂന്നിനാണ് തട്ടിപ്പ് സംഘത്തിന്റെ കെണിയില്‍ അകപ്പെട്ട് കംബോഡിയയില്‍ എത്തുന്നത്. ഒരു ലക്ഷം രൂപ ശമ്പളം വാഗ്ദാനം ചെയ്ത്, വടകര സ്വദേശിയായ സുഹൃത്ത് യുവാക്കളെ ആദ്യം ബാങ്കോക്കില്‍ എത്തിക്കുകയായിരുന്നു. കംബോഡിയയിലെ സൈബര്‍ തട്ടിപ്പ് അവിടെനിന്നാണ് സംഘത്തിന് കൈമാറുന്നത്. സൈബര്‍ കുറ്റകൃത്യങ്ങളുടെ ഭാഗമാകേണ്ടി വരുമെന്ന് അറിഞ്ഞതോടെ ജോലി ചെയ്യാന്‍ വിസമ്മതിച്ച യുവാക്കള്‍ക്ക് ശാരീരിക മാനസിക പീഡനങ്ങളും ഏല്‍ക്കേണ്ടി വന്നു. സാഹസികമായി രക്ഷപെട്ട ഇവര്‍ ഒടുവില്‍ ഇന്ത്യന്‍ എംബസിയെ സമീപിക്കുകയായിരുന്നു.
പേരാമ്പ്ര സ്വദേശിയായ അബിന്‍ ബാബു ഇപ്പോഴും കംബോഡിയയില്‍ തുടരുകയാണ്. താന്‍ സുരക്ഷിതന്‍ ആണെന്ന് അബിന്‍ ബാബു അറിയിച്ചതായി കുടുംബം വ്യക്തമാക്കി. ഇയാളെ തിരികെ എത്തിക്കാനുള്ള ശ്രമവും തുടരുകയാണ്. നാലുപേര്‍ക്കെതിരെ അബിന്‍ ബാബുവിന്റെ പിതാവ് നല്‍കിയ പരാതിയില്‍ പേരാമ്പ്ര പൊലീസ് തട്ടിക്കൊണ്ടു പോകലിന് കേസെടുത്തു.
