കൊല്ലം: ദോശ നൽകാൻ വൈകിയതിന്റെ പേരിൽ തട്ടുകട അടിച്ചുതകർത്ത സംഭവത്തിൽ രണ്ട് പേർ അറസ്റ്റിൽ. കൊല്ലം ശൂരനാട് കോയിക്കൽ ചന്തയിലാണ് സംഭവം.
ശൂരനാട് സ്വദേശിയായ മനാഫും ഭാര്യയും നടത്തുന്ന തട്ടുകടയിലാണ് മൂന്ന് യുവാക്കൾ ആക്രമണം നടത്തിയത്. ദോശ നൽകാൻ വൈകിയതിനെച്ചൊല്ലിയുള്ള തർക്കം കയ്യാങ്കളിയിൽ കലാശിക്കുകയായിരുന്നു. തുടർന്ന് തട്ടുകടയിലെ സാധനങ്ങൾ സംഘം അടിച്ചുതകർത്തു. പ്രായാധിക്യമുള്ള മനാഫിനെയും ഭാര്യയെയും ആക്രമിക്കാനും ശ്രമിച്ചു.
സംഭവത്തിൽ ശൂരനാട് തെക്ക് ഇരവിച്ചിറ സ്വദേശികളായ അജി, രമേശൻ എന്നിവരാണ് അറസ്റ്റിലായത്. ഒരാൾക്കായി പൊലീസ് അന്വേഷണം ഊർജിതമാക്കി. പൊലീസ് എത്തുന്നതോടെ സംഘം രക്ഷപ്പെടാൻ ശ്രമിച്ചെങ്കിലും ഒരാളെ സംഭവസ്ഥലത്തുനിന്നും മറ്റൊരാളെ കായംകുളത്തുനിന്നും പിടികൂടുകയായിരുന്നു.
