തിരുവനന്തപുരം: സവാള വിലക്കയറ്റത്തിൽ അടിയന്തര ഇടപെടലുമായി സംസ്ഥാന സർക്കാർ. ഹോർട്ടികോർപ്പിന്റെ നേതൃത്വത്തിൽ 100 ടൺ സവാള അടിയന്തരമായി എത്തിക്കും. ആദ്യഘട്ടത്തിൽ 20 ടൺ സവാള സംസ്ഥാനത്ത് എത്തി. ഇതിൽ 10 ടൺ മലബാർ മേഖലയിലും 10 ടൺ തെക്കൻ കേരളത്തിലും കിലോയ്ക്ക് 35 രൂപ നിരക്കിൽ വിതരണം ചെയ്യും.
ഉടൻ തന്നെ സപ്ലൈകോ വഴിയും സവാള വിതരണം ആരംഭിക്കും. വ്യാഴാഴ്ച 30 ടൺ സവാള കൂടി സംസ്ഥാനത്ത് എത്തും. പൊതുവിപണിയിൽ 80 രൂപയോളം എത്തിയിരുന്ന സവാള വില നിലവിൽ 65 മുതൽ 70 രൂപ വരെയാണ്. സർക്കാർ ഇടപെടലോടെ വില ഇനിയും കുറയുമെന്നാണ് പ്രതീക്ഷ.
കാസർകോട് ജില്ലയിൽ ഹോർട്ടികോർപ്പിന്റെ മൊബൈൽ യൂണിറ്റ് വഴിയും സവാള വിതരണം നടത്തുമെന്ന് മന്ത്രി അറിയിച്ചു.
അതേസമയം, പച്ചക്കറി നൽകിയ കർഷകരുടെ പണം അന്നുതന്നെയോ തൊട്ടടുത്ത ദിവസമോ വിതരണം ചെയ്തതായും മന്ത്രി വ്യക്തമാക്കി. മഴക്കെടുതിയിൽ കൃഷിനാശം സംഭവിച്ചവർക്ക് നഷ്ടപരിഹാരം നൽകും. കെ.എസ്.ഡി.എം.എ വിജ്ഞാപനം പുറപ്പെടുവിക്കുന്ന മുറയ്ക്ക് തുടർനടപടികൾ സ്വീകരിക്കുമെന്നും മന്ത്രി അറിയിച്ചു.
ഇതിനുപുറമെ, കേരളത്തിലെ നാളികേര മേഖലയുടെ പുനരുജ്ജീവനവും സമഗ്ര വികസനവും ലക്ഷ്യമിട്ട് 500 കോടി രൂപയുടെ ബൃഹത് പദ്ധതി നാളികേര വികസന ബോർഡിന്റെ പരിഗണനയ്ക്കായി സമർപ്പിക്കുമെന്നും ടി. സിദ്ദിഖ് പറഞ്ഞു.
ഒന്നാംഘട്ടത്തിൽ നാളികേര വികസന ബോർഡിന്റെ 500 കോടി രൂപയും സംസ്ഥാന സർക്കാരിന്റെ 41 കോടി രൂപയും ഉൾപ്പെടുത്തി പദ്ധതിയുടെ പ്രവർത്തനങ്ങൾ മുന്നോട്ടുകൊണ്ടുപോകാനാണ് ലക്ഷ്യമിടുന്നതെന്നും മന്ത്രി വ്യക്തമാക്കി.
