കൊച്ചി മുസ്ലിം ഭര്‍ത്താക്കന്മാര്‍ക്ക് നിയമപരമായി തലാഖ് ചൊല്ലാനും ഒന്നിലേറെ വിവാഹം കഴിക്കാനുമുള്ള അവകാശം തടയാന്‍ കോടതികള്‍ക്ക് കഴിയില്ലെന്ന് ഹൈക്കോടതി. വ്യക്തിനിയമം അനുവദിച്ചിരിക്കുന്ന നടപടികള്‍ സ്വീകരിക്കുന്നതില്‍നിന്ന് കോടതികള്‍ ഒരാളെ തടയുന്നത് ഭരണഘടനയുടെ 25-ാം അനുച്ഛേദപ്രകാരമുള്ള അവകാശനിഷേധമാകുമെന്നും ജസ്റ്റിസ് എ മുഹമ്മദ് മുഷ്താഖ്, ജസ്റ്റിസ് സോഫി തോമസ് എന്നിവരടങ്ങുന്ന ഡിവിഷന്‍ ബെഞ്ച് വ്യക്തമാക്കി.
ഒന്നിലേറെ വിവാഹം കഴിക്കുന്നതും വ്യക്തിനിയമപ്രകാരം അനുവദനീയമാണ്. നിയമം സംരക്ഷണം അനുവദിക്കുമ്പോള്‍ അതുപ്രകാരം നടപടികള്‍ അനുവദിക്കാതിരിക്കാന്‍ കോടതിക്കാകില്ല. കുടുംബകോടതി ഉത്തരവ് അധികാരപരിധി ലംഘിക്കുന്നതിനാല്‍ റദ്ദാക്കുന്നതായി ഡിവിഷന്‍ ബെഞ്ച് വ്യക്തമാക്കി. നിയമപരമായല്ല നടപടിക്രമങ്ങള്‍ നടത്തിയതെന്ന് പരാതിയുണ്ടെങ്കില്‍ നടപടിക്രമങ്ങള്‍ പൂര്‍ത്തിയായശേഷം പരാതിക്കാരിക്ക് ഉചിതമായ കോടതിയെ സമീപിക്കാമെന്നും കോടതി വ്യക്തമാക്കി.
