അയോദ്ധ്യ രാമക്ഷേത്രത്തിലെ ദീപാവലി ആഘോഷങ്ങള് ചരിത്രത്തില് അടയാളപ്പെടുത്താന് യുപി സര്ക്കാര്. 28 ലക്ഷം ദീപങ്ങള് സരയു നദിയുടെ തീരത്ത് പ്രഭ ചൊരിയും. പരിസ്ഥിതി സൗഹാര്ദപരമായാണ് ഇത്തവണ ആഘോഷങ്ങള് നടക്കുക. അയോധ്യയില രാം മന്ദിര് നിര്മ്മിച്ച ശേഷമുള്ള ആദ്യ ദീപാവലി ആഘോഷം കൂടിയാണ് ഇത് എന്ന പ്രത്യേകതകൂടിയുണ്ട്.
ഇത്തവണ 28 ലക്ഷം ദിയകള് (ചെറു മണ്ചെരാതുകള്) സരയൂനദീതീരത്ത് തെളിച്ച് ലോക റെക്കോഡ് സ്ഥാപിക്കുകയെന്ന ലക്ഷ്യം കൂടി യോഗി ആദ്യത്യ നാഥ് സര്ക്കാരിനുണ്ട്. കറകളോ പുകയോ പിടിക്കാത്ത തരത്തിലുള്ള പ്രത്യേക വിളക്കുകളാണ് ക്ഷേത്രത്തില് കത്തിക്കാന് തയാറാക്കിയിരിക്കുന്നത്. പരിസ്ഥിതി സംരക്ഷണവും ദീപോത്സവത്തില് വളരെയധികം പ്രാധാന്യം നല്കുമെന്നും സര്ക്കാര് പ്രസ്താവനയിലൂടെ അറിയിച്ചിട്ടുണ്ട്. കാര്ബണ് ബഹിര്ഗമനം കുറയ്ക്കുന്നതിനും ക്ഷേത്രത്തെ പുകക്കറയില് നിന്നും മറ്റും സംരക്ഷിക്കുന്നതിനും പ്രത്യേകം തയ്യാറാക്കിയ മെഴുക് വിളക്കുകളാണ് ഉപയോഗിക്കുന്നതെന്നും സര്ക്കാര് അറിയിച്ചു. പ്രത്യേകം പൂക്കള് കൊണ്ട് രാം മന്ദിര് മുഴുവനും അലങ്കരിക്കും.
ക്ഷേത്രത്തിന്റെ ഓരോഭാഗവും അലങ്കരിക്കാന് പ്രത്യേകം ഉത്തരവാദിത്വപ്പെട്ടവരെയും നിയോഗിച്ചിട്ടുണ്ട്. ഒക്ടോബര് 29 മുതല് നവംബര് 1 രാത്രിവരെ ദര്ശനത്തിനായി ക്ഷേത്രം തുറന്നിരിക്കും. ക്ഷേത്രത്തിന്റെ 4ബി ഗേറ്റില് നിന്നും സന്ദര്ശര്ക്ക് പൂക്കളും ദീപങ്ങളാലും അലങ്കരിച്ച ക്ഷേത്രം വീക്ഷിക്കാനുള്ള അവസരവും ഒരുക്കിയിട്ടുണ്ട്. ദീപോത്സവം 2024ന്റെ ഒരുക്കങ്ങള് പൂര്ത്തീകരണത്തിന്റെ അവസാന ഘട്ടത്തിലാണെന്നും അധികൃതര് അറിയിച്ചു.
സരയൂ നദിയുടെ 55 കല്പ്പടവുകളില് 30,000 വോളന്റിയര്മാരുടെ സേവനമാണ് 28 ലക്ഷം ദിയകള് തെളിക്കാനായി സജ്ജമാക്കിയിരിക്കുന്നത്. വിളക്കു തെളിയിക്കുന്നതിന് 2000 ആളുകള് മേല്നോട്ടവും വഹിക്കും. 80,000 ദിയകള് കൊണ്ട് പ്രത്യേകം സ്വാസ്തിക ചിഹ്നവും ഒരുക്കും. 150 വാളന്റിയര്മാരെയാണ് ഇതിനായി തയാറാക്കിയിരിക്കുന്നത്.
28 ലക്ഷം ദിയകള് സരയൂ നദീ തീരത്ത് തെളിയുക ഒക്ടോബര് 30ന് ചോട്ടി ദീപാവലി ദിവസമായിരിക്കും. പ്രത്യേകം ടി ഷര്ട്ടുകളും ഐഡി കാര്ഡുകളും ക്യൂആര് കോഡ് പതിപ്പിച്ച തൊപ്പികളും വോളന്റിയര്മാര്ക്ക് നല്കും. ഇവര്ക്ക് ഭക്ഷണവും വെള്ളവും നല്കാനുള്ള സൗകര്യവും ഒരുക്കിയിട്ടുണ്ട്.