സംസ്ഥാന സ്കൂള് കലോത്സവത്തിന്റെ സമാപനദിവസമായ നാളെ തിരുവനന്തപുരം ജില്ലയിലെ മുഴുവന് സ്കൂളുകള്ക്കും അവധി പ്രഖ്യാപിച്ച് സര്ക്കാര് ഉത്തരവിറക്കി. പൊതുവിദ്യാഭ്യാസ ഡയറക്ടര് ആണ് അവധി നല്കിയത്. മറ്റു സ്കൂളിലെ കുട്ടികള്ക്ക് കലോത്സവം കാണാന് അവസരം വേണമെന്ന ആവശ്യം ഉയര്ന്ന പശ്ചാത്തലത്തിലാണ് അവധി നല്കുന്നതെന്ന് വിദ്യാഭ്യാസ വകുപ്പ് അറിയിച്ചു. എല്ലാ സര്ക്കാര്, എയ്ഡഡ്, അണ്എയ്ഡഡ് സ്കൂളുകള്ക്കുമാണ് അവധി. നേരത്തെ വേദികള്ക്കും താമസ സൗകര്യം ഒരുക്കിയ സ്കൂളുകള്ക്കും വാഹനങ്ങള് വിട്ടുകൊടുത്ത സ്കൂളുകള്ക്കും മൂന്നു ദിവസം അവധി പ്രഖ്യാപിച്ചിരുന്നു.
സംസ്ഥാന സ്കൂള് കലോത്സവത്തിന് നാളെ തിരശ്ശീല വീഴാനിരിക്കെ സ്വര്ണ്ണക്കപ്പിന് വേണ്ടിയുള്ള പോരാട്ടം കടുക്കുകയാണ്. പോയിനന്റ് പട്ടികയില് നിലവിലെ ചാമ്പ്യന്മാരായ കണ്ണൂര് ഒന്നാം സ്ഥാനത്ത് തുടരുകയാണ്.
ഇതിനിടെ സംസ്ഥാന സ്കൂള് കലോത്സവത്തില് എ ഗ്രേഡ് നേടിയ വിദ്യാര്ത്ഥികള്ക്കുള്ള ട്രോഫി വിതരണം മന്ത്രി വി. ശിവന്കുട്ടി എസ്. എം. വി സ്കൂളില് ഉദ്ഘാടനം ചെയ്തു. പതിനാറായിരത്തോളം പേര്ക്കാണ് ട്രോഫികള് നല്കുന്നത്. ഇതോടൊപ്പം പ്രശസ്തി പത്രവും നല്കും. ബുധനാഴ്ച നടക്കുന്ന സമാപന സമ്മേളനത്തില് ഓവറോള് ട്രോഫിയും ജില്ലാതല വിജയികള്ക്കുള്ള ട്രോഫികളും നല്കും. ചൂരല്മലയിലെ മത്സരാര്ത്ഥികള്ക്ക് പൊതുവിദ്യാഭ്യാസ വകുപ്പിന്റെ പ്രത്യേക സമ്മാനവുമുണ്ട്.
