തിരുവനന്തപുരം: വീട്ടില്‍ 19 കിലോ കഞ്ചാവ് സൂക്ഷിച്ചു വച്ച ദമ്പതികളെ മലയിന്‍കീഴ് പൊലീസ് പിടികൂടി. തൈക്കാട് ജഗതിയില്‍ വിജി എന്ന് വിളിക്കുന്ന വിജയകാന്ത് (29), ഭാര്യ സുമ (28) എന്നിവരാണ് പിടിയിലായത്.
വാടകയ്ക്ക് താമസിച്ചുവന്നിരുന്ന വീട്ടില്‍ നിന്നാണ് കഞ്ചാവ് പിടികൂടിയത്. മലയിന്‍കീഴ് സ്വദേശിയുടെ ഉടമസ്ഥതയിലാണ് ഈ വീട്. വില്‍പനയ്ക്കായി പ്രതികള്‍ സൂക്ഷിച്ച കഞ്ചാവാണ് പിടിച്ചെടുത്തതെന്ന് പൊലീസ് പറഞ്ഞു. കഞ്ചാവ് കിടപ്പു മുറിയില്‍ ചാക്കിലാക്കി സൂക്ഷിച്ച നിലയിലായിരുന്നു. പൊലീസിന് ലഭിച്ച രഹസ്യ വിവരത്തെ തുടര്‍ന്നാണ് അറസ്റ്റ്. ഈ വീട്ടിലേക്ക് ധാരാളം പേര്‍ വന്നു പോകുന്നതായി പൊലീസിന് വിവരം ലഭിച്ചിരുന്നു. ഒരു മാസം മുന്‍പാണ് ഇവര്‍ വീട് വാടകയ്‌ക്കെടുത്തതെന്ന് പൊലീസ് പറഞ്ഞു. പ്രതികളെ റിമാന്‍ഡ് ചെയ്തു.
