തിരുവനന്തപുരം: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ കടുത്ത രാഷ്ട്രീയ വിമർശനവുമായി സിപിഐഎം സംസ്ഥാന സമിതി അംഗം പി. ജയരാജൻ. വെള്ളാപ്പള്ളി നടേശൻ ഒരേ സമയം രണ്ട് തോണിയിൽ കാലുവെച്ച് സഞ്ചരിക്കുന്ന ആളാണെന്ന് ജയരാജൻ കുറ്റപ്പെടുത്തി. വെള്ളാപ്പള്ളി നടേശന്റെ സമീപകാല വർഗ്ഗീയ പരാമർശങ്ങളെ പാർട്ടി ഔദ്യോഗികമായി തള്ളിപ്പറഞ്ഞതിന് തൊട്ടുപിന്നാലെയാണ് പി. ജയരാജന്റെ ഈ പരസ്യ പ്രതികരണം.
വെള്ളാപ്പള്ളി നടേശൻ ഒരേ സമയം നവോത്ഥാന സമിതി അധ്യക്ഷനായി തുടരുകയും, മകൻ തുഷാർ വെള്ളാപ്പള്ളിയെ സംഘപരിവാറിനൊപ്പം നിർത്തുകയും ചെയ്യുകയാണെന്ന് പി. ജയരാജൻ ചൂണ്ടിക്കാട്ടി. ഒരേസമയം രണ്ട് ചേരികളിൽ നിലയുറപ്പിക്കുന്ന ഇത്തരം ബഹുമുഖ വേഷങ്ങളാണ് വെള്ളാപ്പള്ളിയുടേതെന്നും അദ്ദേഹം പരിഹസിച്ചു. ശ്രീനാരായണ ഗുരുദേവന്റെ ഉദാത്തമായ ദർശനങ്ങൾക്ക് പൂർണ്ണമായും എതിരായ നിലപാടാണ് ഇപ്പോൾ എസ്എൻഡിപി യോഗത്തിന്റെ തലപ്പത്തിരിക്കുന്നവർ സ്വീകരിക്കുന്നതെന്നും പി. ജയരാജൻ കുറ്റപ്പെടുത്തി. നവോത്ഥാന മൂല്യങ്ങൾ ഉയർത്തിപ്പിടിക്കേണ്ടവർ വർഗ്ഗീയ അജണ്ടകൾക്ക് കൂട്ടുനിൽക്കുന്നതിനെതിരെ ശക്തമായ രാഷ്ട്രീയ പ്രതിരോധം ഉയർത്തുമെന്നും അദ്ദേഹം വ്യക്തമാക്കി.
