ദില്ലി: എച്ച്ഐവി ബാധിതനായ യുവാവിന്റെ മൃതദേഹം വികൃതമാക്കിയ നിലയില് കണ്ടെത്തി. ദില്ലിയിലെ പാലം വിഹാര് റെയില്വേ സ്റ്റേഷന് സമീപമാണ് മൃതദേഹം കണ്ടെത്തിയത്. ശരീരത്തില് കത്തി കൊണ്ട് നിരവധി മുറിവുകള് ഏറ്റിട്ടുണ്ടെന്നും സ്വകാര്യഭാഗങ്ങള് മുറിച്ചുമാറ്റിയ നിലയിലായിരുന്നുവെന്നും പൊലീസ് പറഞ്ഞു.
ഒരു വഴിയാത്രക്കാരനാണ് മൃതദേഹത്തിന്റെ അവശിഷ്ടങ്ങള് കാണുകയും അധികൃതരെ അറിയിക്കുകയും ചെയ്തത്. സമീപത്ത് നിന്ന് യുവാവിന്റെ ഫോണും കണ്ടെത്തിയിരുന്നു. നവംബര് 25ന് ദ്വാരക സെക്ടര് 23 പൊലീസ് സ്റ്റേഷനില് ഫയല് ചെയ്ത മിസ്സിംഗ് റിപ്പോര്ട്ട് പ്രകാരം ഒരു ഇകൊമേഴ്സ് കമ്പനിയില് എക്സിക്യൂട്ടീവായി ഇയാള് ജോലി ചെയ്യുകയായിരുന്നുവെന്ന് കണ്ടെത്തിയിട്ടുണ്ട്.
യുവാവിന്റെ തലയില് ഭാരമുള്ള കല്ലോ ഇഷ്ടികയോ ഉപയോഗിച്ച് അടിച്ചതായി ദില്ലി പൊലീസ് നടത്തിയ അന്വേഷണത്തില് കണ്ടെത്തിയിരുന്നു. മൃതദേഹം കണ്ടെത്തിയ സ്ഥലത്തിന് സമീപത്തെ സിസിടിവി പരിശോധിച്ചതില് നിന്ന് യുവാവ് പാലം വിഹാര് റെയില്വേ യാര്ഡിലേക്ക് പോകുന്നതിന്റെയും രണ്ട് പേര് പിന്തുടരുന്നതിന്റെയും ദൃശ്യങ്ങള് ലഭിച്ചിട്ടുണ്ട്. പൊലീസ് രണ്ട് പേരെയും ചോദ്യം ചെയ്തെങ്കിലും കൊലപാതകവുമായി ഏതെങ്കിലും തരത്തിലുള്ള ബന്ധം കണ്ടെത്താന് സാധിച്ചില്ല.
യുവാവ് വിവാഹിതനാണെന്നും എച്ച്ഐവി പോസിറ്റീവ് ആണെന്നും കണ്ടെത്തിയിരുന്നു. ഒരു പുരുഷനുമായി യുവാവിന് ബന്ധമുണ്ടെന്ന് ഇയാളുടെ ഫോണിലെ ചാറ്റുകളില് നിന്ന് വ്യക്തമായി. യുവാവ് സ്വവര്ഗാനുരാഗിയാണെന്നതോ അല്ലെങ്കില് രോഗമോ ആകാം കൊലപാതകത്തിന് കാരണമായതെന്നാണ് പൊലീസ് സംശയിക്കുന്നത്. അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
